By Argentina millisinin kapitanı Lionel Messinin milli komandanın heyətində sonuncu oyununa çıxacağı gözlənilir. Ulduz futbolçunun vida qarşılaşmasına maraq o qədər böyük olub ki, biletlər satışa çıxarıldıqdan cəmi dörd dəqiqə sonra tamamilə tükənib.
Xəbəraxını xəbər verir ki, 39 yaşlı hücumçu oktyabrın 6-da Buenos-Ayresdə Benin millisinə qarşı keçiriləcək yoldaşlıq görüşündə Argentina millisinin formasını geyinəcək. Qarşılaşma Bakı vaxtı ilə oktyabrın 7-də baş tutacaq.
Argentina Futbol Assosiasiyasının prezidenti Klaudio Tapia bildirib ki, Messinin oyuna dəvət olunmasında əsas məqsəd ona layiq olduğu vida mərasiminin təşkil edilməsidir.
“Dünyanın ən yaxşı oyunçusu, milli komandamızın simvolu və kapitanımız Lionel Andres Messini oktyabrın 6-da Argentinada layiq olduğu vida mərasimini keçirə bilməsi üçün dəvət etmək qərarına gəldik”, – deyə Tapia bildirib.
Beninlə qarşılaşma 85 min tamaşaçı tutumuna malik “River Pleyt” klubunun “Estadio Monumental” stadionunda keçiriləcək.
Tapia 2022-ci il dünya çempionatının qalibi olan Argentina millisinin bütün üzvlərini də qarşılaşmaya dəvət edib. Onun sözlərinə görə, bu, Messi üçün yaddaqalan tədbir olacaq.
Rəsmi biletlər “DeporTick” platformasında satışa çıxarılıb. Bilet qiymətləri kateqoriyalara görə 59-60 dollar, 119-120 dollar və 210-320 dollar arasında dəyişib. 3-10 yaşlı uşaqlar üçün biletlərin qiyməti isə təxminən 19 dollar olub.
Messinin milli komandadakı son oyunu olması gözlənilən qarşılaşmaya bütün biletlərin dörd dəqiqə ərzində satılması böyük maraq yaradıb. Hazırda biletləri yalnız təkrar satış platformalarında, o cümlədən “StubHub”da və qara bazarda tapmaq mümkündür.
Messinin Argentina millisinin heyətində 208-ci və sonuncu oyununa çıxacağı gözlənilir. O, 125 qolla yığmanın tarixində ən məhsuldar futbolçudur.
Messi avqust ayında 20 illik beynəlxalq karyerasını başa vurduğunu açıqlayıb. O, Argentina ilə 2022-ci ildə dünya çempionu olub, həmçinin 2021 və 2024-cü illərdə Amerika Kubokunu qazanıb.
Qeyd edək ki, Messinin milli komandadakı son qarşılaşmasının Beninə qarşı keçiriləcəyi daha əvvəl açıqlanmışdı.
