İsveçrənin Arqau kantonunun Aarau şəhərində keçirilən elektron musiqi festivalında atəş açılıb.

Kanton polisinin yaydığı məlumata əsasən, hadisə zamanı bir neçə nəfər xəsarət alıb. Ölənlərin olub-olmadığı ilə bağlı hələlik rəsmi məlumat verilməyib.

Silah səsləri gecə saat 02:30 radələrində Şaxen rayonunda yerləşən atçılıq meydanında keçirilən “Aarauer Rave” texnofestivalında eşidilib. Tədbirdə təxminən 3 500 nəfər iştirak edib. Hadisə ilə bağlı yayılan görüntülərdə 10-a yaxın atəş səsinin eşidildiyi bildirilir.

Şahidlərin sözlərinə görə, atəş səsləri başlayandan sonra festival iştirakçılarından bəziləri təhlükəsizlik məqsədilə DJ masasının altında gizlənib.

Polis hadisə yerinə çoxsaylı əməkdaşlar cəlb edib və ətrafdakı insanlara əraziyə yaxınlaşmamaq barədə xəbərdarlıq edib. Əməliyyatda yanğınsöndürənlər, fövqəladə hallar xidmətlərinin əməkdaşları və orduya məxsus helikopter də iştirak edib.

Hazırda insidentin hansı səbəbdən baş verdiyi, eləcə də atəş açan şəxs və ya şəxslərin kimliyi araşdırılır.