By “Xəbəraxını” xəbər verir ki, İstanbulun Başakşehir rayonunun Kayaşehir ərazisində yerləşən orta məktəblərdən birində şagirdlər arasında insident baş verib.
Hadisə səhər saat 08:40 radələrində qeydə alınıb. Məktəbdə hələlik səbəbi müəyyənləşdirilməyən mübahisə və qarşıdurma baş verib. Hadisə barədə məlumat daxil olduqdan sonra əraziyə polis və təcili tibbi yardım əməkdaşları göndərilib.
İlkin müdaxilədən sonra yaralanan şagirdlər xəstəxanaya çatdırılıb.
İstanbul valisi Davut Gül Başakşehir Çam və Sakura Şəhər Xəstəxanasında müalicə olunan şagirdlərə baş çəkib.
Valinin açıqlamasına görə, hadisə nəticəsində ümumilikdə 8 şagird yaralanıb. Onlardan 5-nin xəsarətləri yüngüldür və gün ərzində xəstəxanadan evə buraxılmaları gözlənilir. Daha iki şagirdin müalicəsi davam edir və onların həyati təhlükəsinin olmadığı bildirilib.
Digər bir şagird isə əməliyyat olunur. Valinin sözlərinə görə, əməliyyat başa çatmadığı üçün həmin şagirdin vəziyyəti ilə bağlı hazırda yekun qiymətləndirmə aparmaq mümkün deyil.
Davut Gül hadisədə bıçaqdan istifadə edən şəxsin başqa məktəbdə təhsil alan qız şagird olduğunu bildirib. Onun eyni məhəllədə yaşadığı və məktəbə yaxın ərazidə məskunlaşdığı qeyd edilib. Valinin sözlərinə görə, həmin şəxs məktəb formasında təhsil müəssisəsinə daxil olaraq şagirdlərə hücum edib.
Hadisə ilə bağlı hüquq-mühafizə orqanları tərəfindən araşdırma aparılır. İstanbul Baş Prokurorluğunun da prosesə cəlb olunduğu bildirilib.
İnsidentin başvermə səbəblərinin və hadisənin bütün detallarının araşdırıldığı qeyd olunur.
