By Bakıda keçirilən böyüklər arasında cüdo üzrə dünya çempionatında bu gün yeddinci yarış gününün qarşılaşmaları baş tutacaq. Azərbaycan millisinin dörd üzvü medallar uğrunda mübarizəyə qoşulacaq.
Xəbəraxını xəbər verir ki, qadınların +78 kq çəki dərəcəsində çıxış edən Madina Kaisinova yarışa 1/16 final mərhələsindən başlayacaq. Onun ilk rəqibi İtaliya təmsilçisi Asya Tavano olacaq.
Kişilərin +100 kq çəki dərəcəsində isə Camal Qamzatxanov mübarizəyə 1/32 finaldan başlayacaq. O, ilk görüşündə Çili cüdoçusu Fransisko Solislə qarşılaşacaq.
Eyni çəki dərəcəsində çıxış edən Uşanqi Kokauri və Kənan Nəsibov isə yarışa 1/16 final mərhələsindən qoşulacaqlar. Kokaurinin rəqibi Qırğızıstan təmsilçisi Emirxan Joldoşkazıyev olacaq.
Kənan Nəsibov isə Almaniya cüdoçusu Losseni Kone ilə Serbiya təmsilçisi Vidak Malyeviç arasında keçiriləcək görüşün qalibi ilə üz-üzə gələcək.
