By Bakıda güclü külək nəticəsində iki vətəndaş müxtəlif xəsarətlərlə xəstəxanaya müraciət edib.
Hadisələr ötən gün axşam saatlarında baş verib. İlk hadisə saat 20:20 radələrində qeydə alınıb. 1952-ci il təvəllüdlü qadın güclü küləyin təsirindən yıxılaraq xəsarət alıb. O, Səhiyyə Nazirliyinin Elmi-Tədqiqat Travmatologiya və Ortopediya İnstitutuna çatdırılıb.
Aparılan tibbi müayinə zamanı qadının sağ ayağının IV daraq sümüyünün sındığı müəyyən edilib. Zərərçəkənə lazımi tibbi yardım göstərilib.
Digər hadisə isə saat 20:40 radələrində baş verib. 1987-ci il təvəllüdlü qadın güclü külək nəticəsində qapının hərəkət etməsi səbəbindən əlindən xəsarət alıb. Müayinədən sonra ona sol əlin 3-cü və 4-cü barmaqlarının kəsilmiş yarası diaqnozu qoyulub.
Hər iki şəxsin vəziyyəti həkimlər tərəfindən qənaətbəxş qiymətləndirilib. Onlar göstərilən tibbi yardımdan sonra ambulator müalicə üçün evə buraxılıblar. Zərərçəkənlərə ev şəraitində müalicə və tibbi nəzarətlə bağlı tövsiyələr verilib.
Mütəxəssislər küləkli hava şəraitində vətəndaşları diqqətli olmağa çağırırlar. Belə havalarda ağacların, reklam lövhələri və konstruksiyalarının, eləcə də təhlükə yarada biləcək digər obyektlərin yaxınlığında dayanmaqdan mümkün qədər çəkinmək tövsiyə olunur.
