By Azərbaycanda oktyabrın 1-dən sabit internet tarifləri ilə bağlı yeni dəyişiklik tətbiq ediləcək.
Dəyişikliyə əsasən, hazırda aylıq qiyməti 18 manat və ya daha aşağı olan sabit internet paketləri minimum 25 manatlıq tarifə keçiriləcək.
Yeni qaydalar yalnız genişzolaqlı sabit internet xidmətlərinə aid olacaq. Mobil rabitə və mobil internet paketlərinin tariflərinə isə dəyişiklik şamil edilməyəcək.
Qərarın əsas məqsədi bazarda internet tariflərinin vahidləşdirilməsi və telekommunikasiya infrastrukturunun inkişafının dəstəklənməsidir.
Dəyişiklikdən çoxsaylı internet istifadəçisinin təsirlənəcəyi gözlənilir. Operatorların yeni tarif paketləri çərçivəsində daha yüksək internet sürəti və əlavə xidmətlər təqdim etməsi də mümkündür.
Provayderlər artıq abunəçiləri qarşıdakı tarif dəyişiklikləri barədə məlumatlandırmağa başlayıblar. Yeni paketlərin şərtləri və təqdim ediləcək əlavə xidmətlərlə bağlı ətraflı məlumatın operatorlar tərəfindən açıqlanacağı gözlənilir.
Hazırda isə bəzi alternativ internet provayderlərinin təklifləri arasında aylıq ödənişi 18 manat və ya daha aşağı olan fiber-optik və ADSL paketləri də mövcuddur.
