By Türkiyənin İstanbul şəhərində güclü yağışların səbəb olduğu sel fəlakəti nəticəsində həyatını itirənlərin sayı artıb. Təbii fəlakət şəhərdə genişmiqyaslı dağıntılara, ev və iş yerlərinin su altında qalmasına, nəqliyyatın hərəkətində ciddi problemlərə səbəb olub.
Xəbəraxını xəbər verir ki, bu barədə “Associated Press” və Türkiyə mediası məlumat yayıb.
Məlumata görə, İstanbulda sel nəticəsində ölənlərin sayı dörd nəfərə çatıb. Xilasedicilər Sarıyer rayonunda körpünün altında 66 yaşlı kişinin meyitini aşkar ediblər. Bundan əvvəl də güclü yağışlar zamanı baş verən hadisələr nəticəsində üç nəfərin öldüyü bildirilmişdi.
Fəlakət zamanı küçələr və yollar su altında qalıb, avtomobillər sel sularına qərq olub, bəzi ərazilərdə nəqliyyatın hərəkəti iflic vəziyyətinə düşüb. Evlərə və kommersiya obyektlərinə ciddi ziyan dəyib.
Rəsmilərin məlumatına görə, şəhərdə zərər və problemlərlə bağlı təxminən 10 min müraciət qeydə alınıb. Ərazidə təmizlik, yardım və xilasetmə işlərinə on minlərlə əməkdaş cəlb olunub. İtkin düşən şəxslərin axtarışı isə davam etdirilir.
Türkiyənin daxili işlər naziri Mustafa Çiftçi İstanbulda baş verən hadisəni 1942-ci ildən bəri qeydə alınan ən ciddi sel fəlakətlərindən biri kimi qiymətləndirib. Rəsmilər qarşıdakı günlərdə də güclü yağış ehtimalı ilə bağlı xəbərdarlıq ediblər.
Qeyd edək ki, güclü yağıntılar İstanbulun müxtəlif rayonları ilə yanaşı, ətraf bölgələrdə də fəsadlara səbəb olub. Səlahiyyətli qurumlar əhalini su basma riski olan ərazilərdən uzaq durmağa və hava xəbərdarlıqlarına əməl etməyə çağırıb.
